Koalicioni i Shqiptarëve të Luginës dorëzoi listën për zgjedhjet parlamentare serbe

Luginë e Preshevës, 25 prill - Koalicioni i Shqiptarëve të Luginës së Preshevës pasi që arriti të grumbulloj nënshkrimet e nevojshme për pjesëmarrje në zgjedhjet parlamentare serbe, dorëzoi të premten, në Beograd, listën elektorale në përkrahje të kandidatëve për deputetë në Komisionin Zgjedhor Republikan.
Ky koalicion i përbërë nga tri parti politike (PVD, LPD, UDSH) dhe një grupim të qytetarëve, për të participuar në këto zgjedhje, shpreson se në zgjedhjet parlamentare të 11 majit do t’i fitojë dy ulëse deputeti në parlamentin e ri republikan.
Kryetari i Shtabit Zgjedhor të Koalicionit, Nadër Sadiku, deklaroi se tashmë partitë politike shqiptare, të cilat marrin pjesë në zgjedhjet parlamentare, kanë arritur qysh të enjten mbrëma, t’i tubojnë nënshkrimet e nevojshme (rreth 11 mijë sosh) për fitimin e të drejtës për pjesëmarrje në zgjedhjet parlamentare të Serbisë që mbahen më 11 maj.
Sipas Sadikut, këto nënshkrime janë tubuar me një angazhim të madh të të gjitha partive politike shqiptare të Luginës së Preshevës, që paraprakisht kanë formuar Koalicionin e Shqiptarëve nga tri partitë politike; Partia për Veprim Demokratik, Lëvizja e Progresit Demokratik dhe Unioni Demokratik Shqiptar, si dhe nga një grupim i qytetarëve.
Me dorëzimin e listës zgjedhore në Komisionin Republikan Zgjedhor, sot në Beograd , Koalicioni i Shqiptarëve të Luginës së Preshevës shpreson se në zgjedhjet parlamentare serbe të 11 majit t’i fitojë dy ulëse deputeti në Kuvendin e ardhshëm republikan.
Ndërkaq, ish-deputeti Riza Halimi, ka deklaruar se mbledhjes së nënshkrimeve të nevojshme i kanë ndihmuar edhe pakicat tjera që jetojnë në Serbi, e veçmas hungarezët e Vojvodinës, çka dhe njëkohësisht, falënderoi popullatën hungareze për ndihmën e dhënë ndaj Koalicionit të shqiptarëve të Luginës, me grumbullimin e nënshkrimeve të tyre.
Do theksuar, se tri partitë politike shqiptare të Luginës; Partia për Veprim Demokratik, e Riza Halimit, Lëvizja e Progresit Demokratik e Jonuz Musliut, Unioni Demokratik Shqiptar, si dhe një grupim i qytetarëve të PDSH-së dhe BDL-së, dy ditë para se të skadoi afati i dorëzimit të listës së deputetëve për zgjedhjet parlamentare serbe, lidhën marrëveshjen dhe zgjeruan koalicionin e shqiptarëve të Luginës, për të participuar në këtë nivel të zgjedhjeve parlamentare, çka dhe u dëshmua me grumbullimin e nënshkrimeve të nevojshme një ditë më parë.

RTV Spektri