Kosova Lindore kërkon ndihmë nga Prishtina dhe Tirana

Kosova është çelësi kyç për Preshevën, Bujanocin dhe Medvegjën

Gjilan, 28 mars (presheva.com) - “Kosova është çelësi kyç për zgjidhjen e problemit të shqiptareve në Preshevë, Bujanoc dhe Medvegjë” kështu u tha të premten në një debat të organizuar nga Klubi i Gazetareve “Beqir Musliu” me temën: “Roli i Kosovës Lindore në Kosovën e pavarur”. Jonuz Musliu ish kryetar i këshillit politik të UÇPMB-së, Riza Halimi kryetar i PVD-së, Tahir Dalipi aktivist nga Lugina e Preshevës, Mitat Saqipi nga PDSH-ja e Preshevës, Sevdail Hyseni nga Bujanoci kanë kërkuar nga Tirana dhe Prishtina angazhim konkret dhe më aktiv për t`i zgjidhur të gjitha të drejtat e garantuara sipas konventave ndërkombëtare të shqiptareve të Kosovës Lindore. Jonuz Musliu tha se roli i shqiptareve të Luginës së Preshevës ka qenë dominantë në zgjidhjen e çështjes së Kosovës. Asnjëherë s`ka munguar ndihma jonë dhe për këtë më së miri dëshmon fakti se gjatë luftës dëshmori i parë i Kosovës ishte nga Kosova Lindore. Ne jemi një mish një gjymtyrë dhe realisht edhe jemi problem i Kosovës. Musliu me fakte shqetësuese ka folur për shpërnguljen e popullatës nga trevat e Karadakut . “Mos harroni se Medvegja është zbrazur dhe atje kemi një pastrim etnik, kurse malësia e Bujanocit me të madhe kanë mësyrë drejtë Kamenicës e Gjilanit”. Duke ju referuar zhvillimeve atje Musliu tha UNHCR, po përgatit tendat rreth Vranjës .Musliu tha se dy shtetet shqiptare duhet të ngrisin zërin dhe të kërkojnë nga bashkësia ndërkombëtare vendosjen e një force ndërkombëtare .Sipas tij lufta institucionale për të drejtat e shqiptareve të atjeshëm ende nuk ka mbaruar. Zgjidhja e problemit të atjeshëm donë shumë sakrifica dhe mund tha ai. Edhe, Riza Halimi kryetar i PVD-së tha se shqiptarët e Luginës duhet t`i gëzojnë dhe t`i kërkojnë të njëjtat të drejta që po i gëzojnë serbët e Kosovës. Beogardi sipas tij nuk ka formulë për të zgjidhur gjendjen e shqiptareve në arsim. Halimi tha se studentët e Luginës duhet të ndihmohen nga institucionet e Kosovës. Kosova duhet të ketë lidhje special me Komunat , Preshevë, Bujanoc e Medvegjë. Ndërsa, Qemajl Mustafa kryetar i Gjilanit tha se jemi në një trekëndësh strategjik. Me Kosovën Lindore na duhen lidhjet speciale sepse vetëm në Gjilan kemi mbi 12 mijë të zhvendosur dhe kjo e sjell Gjilanin në pozita të palakmueshme. Mustafa tha se Gjilani në të ardhmen do të shndërrohet në zonë universitare, e kulturore për të gjithë qytetarët e Kosovës Lindore. Edhe, Tahir Dalipi ish deputet nga Lugina e Preshevës tha se edhe tashti me përqendrimin e madh të forcave militariste në rajon, Serbia dëshmon vrazhdësinë dhe qëndrimin mosbesues dhe diskriminues ndaj asaj pjese të popullatës, kurse sipas tij, roli i Prishtinës dhe i Bashkësisë Ndërkombëtare do të duhej të ishte kyç në zgjidhjen e problemeve të këtë pjesë të Ballkanit. Dalipi tha se edhe për shqiptarët duhet të vlejë parimi i reciprocitetit, si në përfaqësimin në kuvend ashtu edhe në qeveri dhe që ligji kushtetues t’i garantojë të drejtat e shqiptarëve. Sevdail Hyseni veprimtar nga Bujanoci tha se roli i mediave në sensibilizimin e të drejtave të shqiptareve në Luginën e Preshevës është i madh. “Ne duhet patjetër të këmbejmë përvojën e njëri tjetrit dhe pse jo edhe të kërkojmë ndihmën profesionale nga Kosova. Baki Rexhepi gazetar dhe Jeton Ismajli gjithashtu gazetar kanë premtuar se një debat me një temë të ngjashme ka nevojë urgjente që të mbahet edhe në Bujanoc apo Preshevë. Ndërsa, Hysen Durmishi nga lëvizja “Vetëvendosje” tha se Kosova kaherë e ka tradhtuar Kosovën Lindore sepse shumë familje të ish ushtarëve dhe ish pjesëtarëve të UÇK-së që vijnë nga ai rajon trajtohen tmerrësisht nga institucionet e Kosovës. Kosova mund ta ndihmojë Kosovën Lindore vetëm nëse nuk e pranon decentralizimin. Nebih Aliu përgjegjës i kufijve për rajonin e Anamoravës në SHPK tha se lufta kundër krimit të organizuar dhe kontrabandës do të vazhdojë edhe në të ardhmen në kufi me Serbinë. Në debat kanë folur edhe Baki Rexhepi, Jeton Ismajli, Mitat Saqipi, Nijazi Kadriu etj. Debati është mbështetur nga Fondacioni Friedrich Ebert Stiftung me seli në Prishtinë.


Të lirohet Shefket Musliu dhe të gjithë ish ushtarët

Jonuz Musliu ka kërkuar lirimin e të gjithë ish pjesëtareve të UÇPMB-së. Ata që luftuan për të drejtat e shqiptareve të Kosovës Lindore sot po dergjen burgjeve të UNMIK-ut. Kjo ishte një padrejtësi shekullore dhe kërkojmë nga Ministria e Drejtësisë që të lirojë sa më shpejt ish komandantin e UÇPMB-së, Shefket Musliun dhe bashkëluftëtarët e tij.

MUSA SABEDINI
Kryetar i Klubit tė Gazetarve ' Beqir Musliu' - Gjilan