Këshilli drejtues i TVP: Televizioni Presheva duhet të vazhdojë edhe më tej punën e rregullt

Preshevë, 04 gusht, (TVP, presheva.com) - Këshilli drejtues i Ndërmarrjes Publike Informative Presheva në Preshevë ka mbajtur mbledhjen e vetë të rregullt në lokalet e këtij institucioni. Sipas kryetarit të këshillit drejtues, Baki Rexhepi në këtë takim është bërë shqyrtimi i konkursit për drejtor në këtë ndërmarrje. Anëtarët e këshillit drejtues gjithashtu janë informuar me procedurat e zbatuara në lidhje me konkursin që tani më është mbyllur dhe për personin që ka kandiduar për drejtor. Në kuadër të mbledhjes së sotme është bërë edhe shqyrtimi i gjendjes pas mbylljes tre ditore të Televizionit Presheva. Në lidhje me këtë pikë të rendit të ditës ka pasur më shumë diskutime nga anëtarët prezent të këtij organi. Sipas zotit Rexhepi Televizioni Presheva duhet të vazhdojë edhe më tej punën e rregullt duke u kompletuar me organet e veta për të vazhduar në përmbushjen e obligimeve në lidhje me dokumentacionet për frekuencë të Televizionit. Këshilli drejtues i kësaj ndërmarrje ka marrë qëndrimin që konkluzionet e dala nga kuvendi komunal të datës 30 qershor për vazhdimin punës së mëtutjeshme të Televizionit Presheva të i dërgohen të gjitha organeve qeveritare dhe ndërkombëtare.