Promovohet libri që trajton platformën e Bashkimit Kombëtar

Shkruan: Valon BEGZADI

Tiranë – 06 shkurt 2010 – Në Hotel Tirana “Internacional” është bër promovimi i Librit të ri nga publicisti dhe studiuesi Koco Danaj. Platformë që trajton bashkimin e shqiptarëve me titull “Platforma e Shqipërisë Natyrale”, eveniment ku kanë marrë pjesë mbi 100 të ftuar nga të gjithë trojet shqiptare si nga Kosova, Maqedonia, Presheva, Bujanoci dhe Mali i Zi. Sipas Danajt, platforma e Shqipërisë natyrale bazohet në trashëgiminë pozitive të shqiptarëve, që nga epoka e Skënderbeut dhe përvoja e Lidhjes së Prizrenit.
“Një Shqipëri natyrale, që do të përfshinte të gjitha territoret e marra nga fqinjët, është një realitet njerëzor që duhet të kthehet dhe në realitet gjeopolitik”.

Në këtë eveniment ka marrë pjesë edhe kryetari i Komunës së Bujanocit Shaip Kamberi dhe njëherit nënkryetar i PVD-së me përfaqësuesit e tjerë të Ndërrmarjeve Publike të Bujancit.
Pyetjes se a besoni se Shqipëria Natyrale, një ditë do të vij që trojet shqiptare do të bashkohen, z.Kamberi i është përgjigjur:

“Momentalisht projekti jonë politik është i orientuar në realizimin e të drejtave tona kolegëtive dhe individuale, besojmë se integrimet evropiane do ta bëjnë të mundshme edhe integrimin gjithë shqiptar. Për ne është i rëndësishëm bashkëpunimi me Tiranën dhe Kosovën, e posaçërisht në sferën e arsimit, kulturës dhe informimit dhe këto janë projekte të cilat, politika jonë momentalisht mbështetet.
Po në dokumentin politik të aprovuar nga të gjitha partitë politike shqiptare në vitin 2006, eksizton parimi i përbashkët dhe koncezusi se ne i përkrahim parimet e bashkësisë ndërkombëtare në zgjidhjen e statusit të Kosovës, me këtë pandryshueshmërinë e kufijve, por deri në momentin kur integrititeti territorial i Kosovës mbetet ky sic është shpallur me deklaratën e pavarësisë. Cfardo ndryshimi qe do të ketë në atë qëndrim do të reflektoj patjetërsisht edhe në qëndrimin e shqiptarëve të Luginës së Preshevës duke kërkuar reciprocitetin në raport me të drejtat e komuniteteve të tjera dhe në raport me bashkësinë ndërkombëtare”.

 

Autori i librit Koco Danaj me delegacionin nga Bujanoci

Në pamundësi pjesëmarrje në këtë eveniment, Jonuz Musliu, kryetar i kuvendit komunal të Bujanocit dhe kryetar i LPD-së, i cili ishte në një vizitë zyrtare në Itali, i ka dërguar një email në adresën e z.Koco Danajt, një letër përshendëse me rastin e promovimit të librit, ku thuhet:
“Kam kënaqësinë që në emër të Asamblesë komunal të Bujanocit dhe të Lëvizjes së Progresit Demokratik, të përshëndes promovimin e librit “Platforma e Shqipërisë Natyrale” të autorit Koco Danaj.
Në pamundësi për të marrë pjesë në këtë promovim, shfrytëzoj rastin nga Italia, t’ia përcjell autorit të Platformës së Shqipërisë Natyrale një mesazh përgëzimi, për punën e palodhshme dhe kreative, që shqiptarët e të gjitha viseve etnike më në fund të kenë një Platformë, në mënyrë që ata të orientohen politikisht drejt një bashkimi të natyrshëm.
Ne shqiptarët e Luginës së Preshevës të ndarë padrejtësisht nga trungu natyror shqiptar, të ngelim edhe me tej qendra rrethi në Serbi me shpresë se me integrimet evropiane edhe ne të na qesh fati i bashkimit kombëtar, ashtu sic u bashkuan edhe gjermanët edhe disa popuj të tjerë.
Ne e kemi lexuar me interesim këtë libër dhe e përshëndesim autorin e saj për një kontribut të madh që e ka dhënë dhe po e jep në favor të avancimit dhe promovimit të çështjes kombëtare shqiptare në Ballkan.
z.Danaj është një njohës i madh i çështjeve shqiptare në përgjithësi dhe përmes kësaj Platforme ka dhënë një pasqyrë të qartë rreth Shqipërisë natyrale, të një Shqipërie normale me pjesët e saj të ndara në shumë shtete e krahina.
Të nderuar pjesëmarrës të këtij promovimi dhe shumë i respektuari autor, ju dëshiroj suksese në fushën e botimeve të reja dhe suksese.

Sirenë (Itali), 6 shkurt 2010
Jonuz Musliu – kryetar i Asamblesë Komunale të Bujanocit dhe LPD-së”


Në librin e Danajt theksohet se “Shqipëria natyrale synon shndërrimin e kombit shqiptar nga zjarrfikës, siç është sot në paqebërësin kryesor të rajonit të Ballkanit. Paqja dhe stabiliteti rajonal ka nevojë për paqebërës dhe jo për zjarrfikës. T’i caktosh kombit shqiptar rolin e zjarrfikësit, do të thotë se parashikon zjarre të tjerë në rajonin e Ballkanit”... Koço Danaj, një studiues dhe drejtues i Institutit të Prognozave Rajonale, ka një përvojë të gjatë në çështjet e shqiptarëve dhe madje ka punuar edhe si këshilltar pranë ish-kryeministrit, Ilir Meta.