Dacia Logan Prestige

(presheva.com) -Modeli i lirë i mekanikës franceze të nënshkruar në Rumani në një afat të shkurtër e ka arritur qëllimin. Shitja e shkëlqyeshme i ka rritur Dacia-s apetitin për të tërhequr edhe më shumë vozitës duke modifikuar veturat e tyre.

Dacia në modelin e ri të Logan, Prestige ka shtuar si risi tapiceri të re dhe ngjyrën e shasisë, kujdes të veçantë Dacia i ka kushtuar edhe dritave të përparme të cilat në modelin e ri janë të kristalta, poashtu Dacia në koleksionin e ri ka modifikuar hapjen e bagazhit.

Përveç ndryshimeve estetike modeli i ri i Dacia-s ka edhe një motor më të mirë. Prestige ka një motor të Renault-it 1.6 16V e cila prodhon 105 kuaj fuqi (77kw) me 5.750 rrotullime për minutë.

Koleksioni i ri Logan përveç tapicerisë së re poashtu i ka kushtuar rëndësi edhe sistemit të zbavitjes, modeli i ri i Logan-it tash vjen me një Blaukpunkt RDS me kasetë, CD apo CD me MP3.  

Sa i përket pamjes së jashtme përveç ndryshimit të dritave në të kristalta, shasisë së Logan-it i janë shtuar edhe dy spojlera të ri. Prestige vjen me një zgjidhje më të madhe të ngjyrave: Mineral Blue, Platinium Grey dhe Tundra Beige. Këto ngjyra janë moderne dhe janë në trend me prodhimet tjera, gjë e cila do të riafirmojë pamjen moderne të Logan-it. 

Motori 1.6 16V i prodhuar nga Renault prodhon 105 kuaj fuqi, shpejtësinë prej 100 km/h e arrin për 10.2 sekonda. Shpejtësia maksimale është 183 km/h. Prestige 1.6 16V ka nevojë të ndërrojë vajin në çdo 30.000 km, fakt që e bënë Dacian të lehtë për tu mirëmbajtur dhe vjen me garancion tre vjeçar apo 100.000 km (në vendet e BE-së). 

Dacia Logan Prestige tashmë mund të porositet në përfaqësuesit e Dacias në tërë botën dhe çmimi i tij variron nga 7.600 deri në 10.590 euro.

Vazhdon suksesi i Dacia-s 

Që nga lansimi në Shtator të vitit 2004, Logan ka pasur një karrierë të suksesshme në të gjitha tregjet ku është shitur. Plotëson nevojat e blerësve në tregjet në rritje si dhe në Evropën Perëndimore, posaçërisht vozitësit meshkuj të moshës 35 deri 55 vjeçar. 

Më shumë se 291.000 Logan-ë janë shitur në mes të Shtatorit 2004 dhe Qershorit 2006. Dacia ka rreth 45 përqind të tregut të automobilave në Rumani ku edhe prodhohet dhe është modeli më i shitur në vend. Në Mars 2006, Dacia u bë automobili më i shitur edhe në Maroko.

Për gjysmën e parë të vitit 2006, shitjet e Loganit në Evropën Lindore (Përfshirë Rumaninë) përbëjnë 40 përqind të totalit të shitjeve, 22 përqind në Evropën Qendrore dhe Perëndimore, 19 përqind në Rusi, 10 përqind në vendet arabe, 3 përqind në Turqi dhe 6 përqind në pjesën tjetër të botës.

Që nga viti 2004, Logan është prodhuar në Pitesti, Rumani, por që nga Prilli i vitit 2005 prodhohet në Rusi, Maroko dhe Kolumbi. Fabrika në Pitesti tash për tash prodhon 780 Logan-a. Për të plotësuar kërkesat ky numër gradualisht do të rritet në 840 vetura të prodhuara në ditë deri në fund të vitit kur edhe do të arrihet kapaciteti total i prodhimit në 235.000 vetura të prodhuara në vit. Në vitin 2008 prodhimi vjetor pritet të arrijë në 350.000 vetura. Përveç fabrikave aktuale Logan planifikon të fillojë prodhimin edhe në Iran, Indi dhe në Brazil.

 
© presheva.com