Luan Krasniqin shenon fitore të re

Rikthim i suksesshëm në ring për Luan Krasniqin. Boksieri shqiptaro-kosovar, ish-Kampion Evrope ka koleksionuar një tjetër fitore dje në mbrëmje në “Olimpiahalle” të Mynihut, ku ka mundur amerikanin Doug Liggion.
Krasniqi është ngjtur në ring pas ndeshjes së shokut të tij të skuadrës tek “Universum Box” Vladimir Klitschkov. Që në raundin e parë, ai ka lënë të kuptohet, se zotëron një bagazh të mirë teknik, duke vendosur diktatin në arenën e ringut të Mynihut. Ndërkohë që kundërshtari (me një karrierë prej 9 fitoresh, 1 barazimi dhe 3 humbjesh në 13 ndeshje të zhvilluar në boksin profesionit), e ka patur të vështirë të përballojë Luanin. Pas raundit të tetë, boksieri shqiptar është shpallur fitues në bazë të pikëve të grumbulluara gjatë kësaj ndeshjeje, e cila i hap tashmë atij rrugën për t’u ndeshur për një titull ndërkombëtar.